53 ára gamall leigubílstjóri frá Argentínu vann hugi og hjörtu áhorfenda og dómara í nýjasta þætti America´s Got Talent með flutningi sínum á hinni klassísku óperuaríu Nessun Dorma. Hlaut hann standandi lófaklapp undir lokin og yfirgaf sviðið með gleðitár í augum.

Áður en Carlos De Antonis hóf flutning sinn sagði hann dómnefndinni frá því að einn af farþegum hans hefði heyrt hann syngja í bílnum og í kjölfarið hvatt hann til að fara í prufu fyrir þættina. Kvaðst hann jafnframt láta sig dreyma um að vera atvinnusöngvari og koma fram á sviði í Las Vegas.

Óhætt er að segja að hinn söngelski leigubílstjóri hafi hrifið allan salinn með sér þegar hann hóf upp raustina en líkt og sjá má gaf hann sig allan í flutninginn.

„Við ættum að vera að fleygja blómum upp á sviðið til þín Carlos! Þú varst svo góður!“ sagði Heidi Klum eftir að Carlos hafði lokið flutningi sínum. Howie Mandel, sem hafði staðið á fætur áður en flutningum lauk, sagði Carlos vera „ótrúlegan.“ „Þú gefur svo mikið af þér,“ sagði hann áður en hann sneri sér að hinum dómurunum og sagðist elska Carlos.

Mel B sagði Carlos hafa sungið af ástríðu sem hefði komið hefði frá „dýpstu hjartarótum og dreift sér yfir allan salinn.“ „Þetta var stórfenglegt.“ Og Simon Cowell, sem lengi hefur verið þekktur fyrir dómhörku og vægðarlausa framkomu í garð keppenda átti varla til orð yfir hæfileikum Carlos:

„Ég veit ekki mikið um klassíska tónlist. En leyfðu mér að segja þér af hverju ég elska að búa til þennan þátt. Það er vegna þess að þeir einu sem skipta máli í þessum þætti eru áhorfendurnir. Og þegar þeir elska einhvern, þá elska þeir einhvern. Þú gafst þeim hjarta þitt.“

[youtube https://www.youtube.com/watch?v=Qwgv3MiH3xM&w=600&h=480]