Búist er við því að peysa, sem Kurt Cobain heitinn var í á hans þekktustu tónleikum, muni seljast á 300 þúsund dali, eða rúmar 37 milljónir króna, þegar hún fer á uppboð á næstunni.
Cobain svipti sig lífi árið 1994 en hann var söngvari, gítarleikari og lagasmiður rokkhljómsveitarinnar Nirvana. Cobain klæddist umræddri peysu á MTV Unplugged-tónleikum Nirvana sem fram fóru nokkrum mánuðum fyrir andlát hans. Samnefnd plata kom út eftir andlát hans og seldist í bílförmum.
Peysan seldist síðast á rúma 137 þúsund dali árið 2015 en hún verður boðin upp að nýju þann 25. október næstkomandi. Þess er getið í lýsingu Julien’s Auctions, sem stendur fyrir uppboðinu, að peysan hafi aldrei verið þvegin.
Þannig eru blettir í henni og meira að segja lítið gat sem líklega kom eftir sígarettu.