Það voru mörg lið sem höfðu áhuga á að fá Óskar Örn Hauksson í sínar raðir eftir tímabilið 2006.

Óskar Örn var þá á mála hjá Grindavík en liðið féll úr efstu deild og ljóst að Óskar myndi líklega fara annað.

Það var KR sem tókst að tryggja sér Óskar og hefur hann verið samningsbundinn liðinu undanfarin 12 ár.

Óskar staðfesti það í hlaðvarpsþættinum 90 mínútur í gær að nánast öll lið í efstu deild hafi viljað fá sig.

,,Ég held að flest lið hafi haft samband. Ég var bara hættur að taka símann nema kannski eftir 10 á kvöldin þá voru félagarnir að hringja!“ sagði Óskar.

,,Þetta var alveg þannig. Ég vissi af áhuga KR þarna áður en tímabilið kláraðist og það var svosem ekkert sjálfgefið að ég myndi fara úr Grindavík.“

,,Mér fannst hrikalega gott að vera þar og átti mjög góðan tíma þar en ég var ungur og var með metnað því að spila í efstu deild.“

,,Þegar ég heyri af áhuga KR þá kom eiginlega ekkert annað til greina.“