Á tíunda tímanum í gærkvöldi höfðu lögreglumenn afskipti af unglingum við Skógarsel í Breiðholti en ungmennin voru grunuð um að vera með fíkniefni í fórum sínum. Meint fíkniefni fundust hjá 14 ára stúlku og voru þau haldlögð. Foreldrum hennar og barnaverndaryfirvöldum var tilkynnt um málið.
Á ellefta tímanum í gærkvöldi var maður handtekinn við Lindargötu en hann er grunaður um eignaspjöll, skemmdarverk á bifreið. Hann var vistaður í fangageymslu. Á svipuðum tíma höfðu lögreglumenn afskipti af manni í Laugardal en hann er grunaður um vörslu fíkniefna.
Um klukkan 18 í gær komu íbúar í húsi í Garðabæ að ókunnugum aðila í húsi þeirra. Hann hljóp á brott og virðist ekki hafa náð að stela neinu.
Á fimmta tímanum í nótt var ökumaður handtekinn á Breiðholtsbraut en hann er grunaður um akstur undir áhrifum fíkniefna og brot á vopnalögum en hann var með eggvopn meðferðis.
Á tólfta tímanum í gærkvöldi var akstur hópferðabifreiðar stöðvaður á Suðurlandsvegi en hraði bifreiðarinnar mældist 146 km/klst en leyfður hámarkshraði er 90 km/klst. Ökumaðurinn, sem er erlendur, sagði þetta vera eðlilegan hraða á vegum í Evrópu. Skömmu síðar var akstur annars ökumanns stöðvaður á Suðurlandsvegi en sá ók á 123 km/klst og er auk þess grunaður um að hafa verið undir áhrifum fíkniefna.
Fjórir ökumenn voru handtekni í gærkvöldi og nótt, grunaðir um ölvun við akstur. Tveir þeirra reyndust vera sviptir ökuréttindum.
Þrír ökumenn til viðbótar voru handteknir í nótt, grunaðir um að vera undir áhrifum fíkniefna.