Á sunnudaginn lést Johnny Lee Vann Jr., 35 ára, þegar hann bjargaði báðum börnum sínum úr sjávarháska á ströndinni við Wrightsville í Norður-Karólínu í Bandaríkjunum. Fjölskyldan hafði farið á ströndina eftir að hafa sótt messu. Stór alda hreif börn hans með niður af bryggju við ströndina.

ABC News skýrir frá þessu. Johnny sá hvað gerðist og hljóp strax til aðstoðar.

„Hann fór úr skyrtunni og hljóp á fullri ferð þarna út. Hann gerði það sem sérhver faðir myndi gera við aðstæður sem þessar.“

Sagði eiginkona hans, Dawn, í samtali við WRAL sjónvarpsstöðina.

Johnny tókst að bjarga öðru barninu úr sjónum án vandræða en þegar hann fór út í til að bjarga hinu barninu lenti hann í vandræðum. Talsmaður lögreglunnar sagði að Johnny og barnið hafi farið á kaf í um 30 sekúndur áður en þeim var bjargað. Endurlífgunartilraunir á Johnny báru ekki árangur en börnin lifðu bæði af.