Fjögur börn á aldrinum 10 til 14 ára fóru nýlega í um 1.000 km langa ökuferð í Nissan Patrol jeppa foreldra eins þeirra. Þau óku meðfram austurströnd Ástralíu þar til lögreglan stöðvaði ferð þeirra daginn eftir að þau lögðu af stað. Þá höfðu þau stolið bensíni á tveimur stöðum og sloppið einu sinni undan laganna vörðum.

Þegar lögreglan stöðvaði för þeirra á sunnudaginn nærri Grafton í Nýju Suður-Wales læstu börnin dyrunum og neituðu að koma út úr bílnum. Lögreglumenn notuðu þá kylfu til að brjóta rúðu í bílnum. Ekki er enn vitað hvort þau skiptust á um að aka eða hvort eitt þeirra hafi alfarið séð um aksturinn.

Talsmaður lögreglunnar sagði að börnin verði kærð fyrir þetta.