Dani Mathers, fyrirsæta sem meðal annars hefur setið fyrir hjá Playboy, hefur verið sakfelld fyrir að smána 71 árs gamla konu á Snapchat.

Dani tók mynd af konunni í búningsklefa líkamsræktarstöðvar á síðasta ári og birti myndina á Snapchat. Með myndinni fylgdi texti sem smánaði konuna og gerði lítið úr líkama hennar.

Dani þarf að sinna samfélagsþjónustu í 30 daga og mun starf hennar meðal annars felast í því að mála yfir og þvo burt veggjakrot af veggjum. Dani átti yfir höfði sér allt að sex mánaða fangelsi en komst að samkomulagi við saksóknara um þessa refsingu.

Þá verður Dani að halda skilorð næstu þrjú ár, ella eiga á hættu að fara í steininn. Dani baðst afsökunar eftir að málið komst í hámæli.