Stórfyrirtækið Facebook neyðist til þess að greiða fimm milljarða dala sekt, eða rúmlega 630 milljarða íslenskra króna, en um er að ræða hæstu sekt sem Alríkisviðskiptastofnun Bandaríkjanna (e. FTC) hefur lagt á fyrirtæki.
Fjöldi erlendra fjölmiðla hafa greint frá þessari niðurstöðu en hún kemur í ljósi leka á persónuupplýsingum. Á síðasta ári mætti frumkvöðullinn Mark Zuckerberg fyrir þingnefnd Bandaríkjaþings og svaraði fyrir aðgerðir fyrirtækisins. Þá hafði miðillinn deilt upplýsingum 87 milljóna notenda með hinu umdeilda greiningarfyrirtæki Cambridge Analytica eftir að í ljós kom að ráðgjafafyrirtækið Cambridge Analytica nýtti sér gögn frá Facebook til að stunda hnitmiðaðan áróður fyrir Donald Trump, sem réð fyrirtækið í kosningabaráttunni. Heimsbyggðin fylgdist vel með fundinum en Mark endurtók afsökunarbeiðni sína vegna málsins og lofar endurbótum á kerfi Facebook.
Í fyrrasumar lagði síðan fjárfestingasjóðurinn Trillium Asset Management fram tillögu um að reka Mark Zuckerberg úr stjórnarformannsstólnum stuttu áður en svört ársfjórðungsskýrsla og svartsýni fjármálastjórans ollu fimmtungslækkun hlutabréfa í félaginu. Í þeirri tillögu segir meðal annars að „framkvæmdastjóri sem einnig gegnir hlutverki stjórnarformanns hafi óhóflega mikið vald yfir stjórninni, og veiki þar með aðhaldshlutverk hennar,“ og felur þess í stað í sér að skipaður verði óháður stjórnarformaður.
Facebook var í október á síðasta ári sektað um 500 þúsund pund af persónuverndarstofnun Bretlands. Tillaga Alríkisviðskiptastofnunar Bandaríkjanna mun nú fara til dómsmálaráðherra Bandaríkjanna sem taka mun afstöðu til samþykktar hennar.