Stjórnarliðar óttast að þingmenn Miðflokksins muni ekki virða samkomulag sem gert var í síðasta mánuði um afgreiðslu orkupakka þrjú í haust. Samkvæmt heimildum DV var undirritað samkomulag um að umræðan megi ekki taka meira en þrjá daga þegar þing kemur saman að nýju. Óttast er að samkomulagið muni ekki halda, enda muni Miðflokksmenn benda á ný sérfræðiálit máli sínu til stuðnings og réttlæta þannig lengri umræðu. Þannig sé allt eins líklegt að málþóf verði aftur raunin.
Víðtækur stuðningur er við orkupakkann í stjórnarliðinu, en samkvæmt heimildum hefur helsta andstaðan verið frá Ásmundi Friðrikssyni í Sjálfstæðisflokknum. Hann hefur lýst sig andsnúinn orkupakkanum og á þessari stundu er óljóst hvernig hann greiðir atkvæði. Þrátt fyrir víðtæka andstöðu meðal almennra flokksmanna í Framsókn og Vinstri grænum er talið að þingflokkar þessara flokka muni standa nokkuð þétt saman og greiða atkvæði með málinu.
Forsvarsmenn stjórnarflokkanna reyna að nýta sumarið til að lægja öldur í þjóðfélaginu vegna þriðja orkupakkans og líka innan sinna raða. Ekki er rætt um ákveðnar breytingatillögur, heldur er þess freistað að koma umræðunni í þann farveg sem þykir henta best.
Haraldur Benediktsson þingmaður Sjálfstæðisflokksins lagði þó til í síðustu viku að ekki yrði farið í lagningu sæstrengs nema að undangenginni þjóðaratkvæðagreiðslu. Þetta mál mun hafa verið rætt í þingflokki Sjálfstæðisflokksins en samkomulag er ekki endilega um þessa tillögu. Frekar er litið á hana sem einn möguleika af mörgum til að finna sátt í þjóðfélaginu um þetta stóra deilumál.