Samkvæmt niðurstöðum nýrrar rannsóknar vísindamanna hjá ETH háskólanum í Zürich í Sviss er gróðursetning trjáa áhrifarík leið til að berjast gegn áhrifum losunar gróðurhúsalofttegunda. Einnig kemur fram að þetta sé líklega ódýrasta, einfaldasta og áhrifamesta lausnin. Ef nógu mörg tré verða gróðursett geta þau dregið í sig tvo þriðju hluta þeirra gróðurhúsalofttegunda sem mannkynið hefur losað út í andrúmsloftið.

National Geographic hefur eftir Tom Crowther, einum vísindamannanna, að niðurstöður rannsóknarinnar sýni að gróðursetning trjáa sé besta lausnin sem við höfum í dag á loftslagsvandanum. Ef gripið verði til aðgerða nú þegar sé hægt að minnka magn koltvíildis í andrúmsloftinu um 25%. Þá væri magnið í andrúmsloftinu eins og það var fyrir hundrað árum.

Risastór skógur

Í rannsókninni er því slegið fast að nægilegt landrými sé til að auka skóglendi heimsins um þriðjung og það án þess að hafa áhrif á núverandi byggðir eða landbúnað. Vísindamennirnir telja að jörðin geti borið 0,9 milljarða hektara af skóglendi til viðbótar því sem nú er. Það er svæði á stærð við Bandaríkin.

Þótt það takist að takmarka hlýnun loftslagsins við 1,5 gráður mun það svæði sem hentar fyrir gróðursetningu trjáa minnka um fimmtung fram til 2050 því það verður einfaldlega of hlýtt á mörgum svæðum til að tré geti þrifist þar.

Gróðursetja þarf um einn milljarð trjáa til að ná markmiði vísindamannanna en það myndi kosta um 300 milljarða dollara en er samt sem áður langódýrasta lausnin sem þekkt er í dag.