Líkt og greint var frá um helgina þá virðist sem Gunnar Rúnar Sigurþórsson, sem myrti Hannes Þór Helgason með hrottalegum hætti árið 2010, sé búinn að stofna aðgang á stefnumótaforritinu Tinder. Skjáskotum af þessu er deilt innan Facebook-hópsins Stöndum saman – Stefnumótaforrit. Myndirnar má sjá hér fyrir neðan. Gunnar Rúnar lýsir sér svo á forritinu: „Ég hef gaman af Anime og tölvuleikjum, en um helgar fer ég í fjallgöngu eða aðra útivist. Ég er að leita að skemmtilegri stelpur fyrir skyndikynni.“

Sjá einnig: Dæmdur morðingi – Gunnar Rúnar – er á Tinder: Gengur líklega laus en hefur ekki lokið afplánun

Ekki er alveg ljóst hvort Gunnar Rúnar hafi lokið afplánun eða sé laus undir eftirliti þar sem Fangelsismálastofnun tjáir sig ekki um einstök mál. Það vekur sérstaklega athygli að Gunnar Rúnar sé á Tinder þar sem mál hans var stimplað sem ástríðuglæpur af þeirri ástæðu að Gunnar Rúnar bar þráhyggju til æskuvinkonu sinnar, sem jafnframt var unnusta Hannesar.

Gunnar var í héraðsdómi metinn ósakhæfur, á grundvelli vitnisburða þriggja geðlækna. Hann var í kjölfarið vistaður á Sogni. Í dómi Héraðsdóms Reykjaness kemur meðal annars fram að Gunnar Rúnar sé hættulegur og að hann hefði sjálfur lýst ofbeldisfullum hugsunum gagnvart fanga, á meðan hann sat í gæsluvarðhaldi. Því eigi hann að sæta strangri öryggisgæslu auk meðferðar, á grundvelli réttaröryggis. Það vakti athygli þegar geðlæknir greindi hann með ástaræði eða „amor insanus“.

Hæstiréttur sneri hins vegar við dómi héraðsdóms í október 2011 og mat svo að Gunnar væri sakhæfur. Hann var í kjölfarið dæmdur til sextán ára fangelsisvistar. Fram kemur í dómi Hæstaréttar að samkvæmt mati geðlæknis á réttar- og öryggisdeildinni að Sogni beri ekki á neinum ranghugmyndum, ofskynjunum, hugsanatruflunum eða brenglaðri raunveruleikaskynjun hjá Gunnari, og ekki heldur ástsýki. Hann beri hins vegar sterk merki persónuleikaröskunar.