Erik Hamren, landsliðsþjálfari, ræddi morðhótanir sem íslenskt íþróttafólk fékk í gær eftir vesen varðandi tyrkneska landsliðið sem er statt hér á landi. Vísir greinir frá.
Það var mikil reiði í Tyrklandi í gær en fólk þar í landi taldi Ísland hafa sýnt landsliði þeirra óvirðingu eftir lendingu á Keflavíkurflugvelli.
Hamren segir að fjölmörgum Íslendingum hafi borist hótanir og fólki sem hafði ekkert með þetta mál að gera.
,,Ég veit ekki hvort ég eigi að segja þetta en ég var leiður í gær því mörgum leikmönnum Íslands, ekki bara aðalliðinu heldur U17 og kvennaliðinu bárust hótanir,“ sagði Hamren.
,,Að mínu mati þá er það sorglegt því þá er þetta klikkaður heimur. Liðið hefur ekkert með þetta að gera. Þau eru alveg saklaus. Svo fá þau morðhótanir, þá vorkenni ég þessum klikkaða heimi.“
,,Við töluðum ekkert um þetta því við vorum að einbeita okkur að fótboltanum, það er okkar starf.“