Prófanir á lyfinu hafa gefið góða raun
„Þetta er fyrsta bóluefnið sem er búið til í fegrunarskyni,“segir Eric Huang sem kveðst vera einstaklega góður í að búa til bóluefni. Hann er nú komin vel á veg með bóluefni sem gæti í framtíðinni verið notað gegn bólum (acne). Eric, sem er prófessor í húðsjúkdómafræðum, segir í samtali við Guardian að hann hafi áður unnið að gerð bóluefnis gegn miltisbrandi.
Eric sem hefur undanfarin 6 ár einbeitt sér alfarið að rannsóknum á Propionibacterium, sem eru bakteríurnar sem orsaka bólur. Hann telur að afraksturinn geti mögulega orðið að bóluefni á næstu árum.
Þá kveðst Eric sjá stóran markað fyrir bóluefni af þessu tagi þar sem gríðarlegur fjöldi fólks glímir þetta hvimleiða vandamál. Prófanir hafa enn sem komið er aðeins farið fram á músum og litlum húðögnum. Vonir standa til að hægt verði að prófa bóluefnið á fólki á næstu tveimur árum.
Bólur eru mjög algengur húðkvilli, sem nær allir unglingar eru móttækilegir fyrir. Orsökin er bólga í fitukirtlunum sem umlykja hársekki líkamshára í andliti og á efri hluta líkamans. Bólur eru algengastar og ná hámarki sínu um 17-19 ára aldurinn, eftir þann aldur minnka þær jafnt og þétt hjá flestum og hverfa yfirleitt um 25 ára aldurinn. Þó geta viðkvæmir einstaklingar glímt við vandann fram til fertugs.
Auk þess fá konur oft bólur fyrir tíðir og á meðgöngu. Bólumyndun getur einnig átt sér stað við mikinn kulda, hita eða mengun.