Afkoma ríkissjóðs getur hugsanlega versnað um allt að 35 milljarða á þessu ári og jafn mikið á næsta ári ef ekki verður gripið til mótvægisaðgerða. Þetta kemur fram í þingsályktunartillögu um endurskoðun á fjármálastefnu fyrir árin 2018-2022 sem Bjarni Benediktsson, fjármála- og efnahagsráðherra, hefur lagt fram á Alþingi.

Morgunblaðið skýrir frá þessu og hefur eftir Bjarna að nú sé rétti tíminn til að snúa hverri krónu við og skoða leiðir til að gera betur. Haft er eftir honum að gripið verði til fjölbreyttra ráðstafana upp á um 10 milljarða á ári.

Ein af hugmyndunum sem er uppi á borðinu núna er að seinka lækkun bankaskatts um eitt ár. Einnig er verið að endurmeta ýmis útgjaldaáform. Þar á meðal er uppbygging á Stjórnarráðsreitnum sem og að hliðra til með ferli uppbyggingar Nýsköpunarsjóðs. Útgreiðslur vegna þyrlukaupa verða einnig færðar til.

Einnig hefur verið unnið að ýmsum umbótaverkefnum til að tryggja að betur sé farið með opinbert fé. Verið er að meta útgjöld og skoða hvort hægt sé að gera betur. Þetta segir Bjarni að eigi að skila ákveðinni hagræðingu á næstu árum. Stafræn opinber þjónusta á einnig að skila hagræðingu. Þegar upp er staðið á þetta að skila nokkrum milljörðum sem stuðla að hallalausum ríkisrekstri.