Sema Erla Serdar, stofnandi hjálparsamtakanna Solaris, telur það skammarlegt að Ísland hafi sent fulltrúa í Eurovision keppnina í ár vegna ástandsins á Gaza og átaka á milli Ísraela og Palestínumanna. Í færslu sinni á Facebook segir hún að þáttakan sé beinn þáttur í hvítþvotti ísraelskra stjórnvalda og ímyndarherferð þeirra í gegnum keppnina.

Þá gagnrýnir hún kynningarherferð Hatara, þar sem hljómsveitameðlimir sjást njóta veðurblíðunnar á meðan átökin eru í gangi. „Það er sorglegt að hugsa til þess að fulltrúar íslensku þjóðarinnar í Eurovision láti vel um sig fara á sólarströnd og undirbúi sig undir að sýna listir sínar á meðan gestgjafinn myrðir saklausa borgara í næsta nágrenni,“ segir Sema.

Sjá einnig: Í gúmmíklæðnaði í steikjandi sól 

Í gærkvöldi særðust fjórir ísraelskir borgarar og lét einn lífið eftir að sprengjum rigndi yfir Ísrael í gærkvöldi. Ísraelsher svaraði með loftárásum og stórskotahríð frá skriðdrekum .Talið er að alls hafi nú ríflega 430 eldflaugum verið skotið frá Gaza síðan í gær, en Ísraelsher segist hafa varpað og skotið sprengjum á yfir 200 skotmörk í Gazaborg á sama tíma. Fjórir palestínskir borgarar fórust í hefndarárásum Ísraela í gærkvöld, þar á meðal þunguð kona og ársgamalt barn hennar.

„Það er ekki of seint að draga sig úr keppni og sýna palestínsku þjóðinni raunverulegan stuðning í verki!“ segir Sema.