Heimildarmyndin Skandall sem sýnd er í fjórum hlutum í Sjónvarpi Símans virðist gera því skóna að elskhugi eiginkonu Geirfinns, Vilhjálmur að nafni, hafi haft eitthvað með hvarf hans að gera. Þetta er ekki fullyrt í myndinni en málin eru dregin upp með þeim hætti að ætla má að þetta sé skoðun þeirra sem standa að myndinni. Um það hvort sú skoðun er rétt skal ekkert ekkert fullyrt hér.
Öll myndin er aðgengileg áskrifendum stöðvarinnar í Sjónvarpi Símans Premium en gera má ráð fyrir því að fáir hafi séð myndina í heild. Hlutarnir fjórir eru sýndir í opinni, línulegri dagskrá á sunnudagskvöldum og er búið að sýna tvo hluta. Sláandi upplýsingar koma hins vegar fram í þeim hlutum myndarinnar sem ósýndir eru. Þar er því lýst hvernig Boris Quatram, höfundur myndarinnar, og hans fólk hafði upp á Vilhjálmi, sem bjó um það leyti í Berlín. Skömmu eftir að Quatram og hans lið hafði haft stutt tal af Vilhjálmi og ætlaði að koma til hans og spyrja hann frekar út í málið, var Vilhjálmur búinn að tæma íbúð sína og var horfinn á braut. Tókst Boris Quatram ekki að hafa upp á honum aftur. Varpar hann fram grunsemdum um að elskhuginn hafi verið varaður við.
Atferli Vilhjálms eins og það birtist í myndinni gæti bent til sektar en um það skal ekki fullyrt hér. Í myndinni kemur einnig fram að Vilhjálmur hafi flúið Ísland á sínum tíma vegna grunsemda um aðild hans að málinu.
Í myndinni er rætt við Dr. John Pearce, fyrrverandi rannsóknarlögreglumann hjá Scotland Yard. Segir hann með ólíkindum að Vilhjálmur hafi ekki verið rannsakaður betur. Raunar hafi lögreglan gefið ótrúlega lítinn gaum að nánasta vina- og ættingjahring Geirfinns.
Varðandi eiginkonu Geirfinns segir Pearce að það sé mjög grunsamlegt þegar í ljós kemur að eiginkona horfins manns hafi ítrekað haldið framhjá eins og raunin hafi verið með hana. Slíkt ætti þegar í byrjun rannsóknar að gera eiginkonuna grunsamlega. John Pearce segir að elskhuginn sé grunsamlegur í málinu. Fram kemur að skýrsla hafi verið tekin af manninum skömmu eftir hvarf Geirfinns og svo önnur skýrsla ári síðar. John Pearce sakar lögregluna um ótrúlega vanhæfni í málinu og veltir því fyrir sér hvort spilling hafi ráðið för en ekki bara vanhæfni.
Í myndinni kemur fram að rannsóknarlögreglumaður sem vann að málinu skömmu eftir hvarf Geirfinns hafi farið með eiginkonu hans í ferð til Betlehem. Var þetta Haukur Guðmundsson. Er þetta athæfi gert grunsamlegt í myndinni. Óstaðfestar heimildir DV herma að tilgangur ferðarinnar hafi verið að leita að miðli sem gæti fundið eitthvað út um afdrif Geirfinns. Ef það er satt mætti ætla að eiginkona Geirfinns hafi ekkert vitað um hvarf hans.
Geirfinnsmálið er eitt frægasta sakamál Íslandssögunnar. Geirfinnur hvarf að kvöldi 19. nóvember árið 1974. Tveimur árum síðar féll grunur á fjögur ungmenni sem að lokum voru ákærð og dæmd fyrir að hafa valdið dauða hans. Þau voru öll sýknuð við endurupptöku málsins í lok september 2018.
