Fréttablaðið skýrir frá þessu í dag. Segir blaðið að í fyrstu hafi 400 milljónir verið settar í málið en bætt hafi verið við upphæðina til að liðka fyrir samningum. Blaðið segist hafa heimildir fyrir að í viðræðunum sé miðað við að fjárhæðinni verði skipt á milli hinna sýknuðu í hlutfalli við lengd þess gæsluvarðhalds sem þeir sátu í og verði óháð því hvort viðkomandi sé á lífi en Sævar Ciesielski og Tryggvi Rúnar Leifsson eru látnir. Bætur til þeirra munu þá renna til erfingja þeirra.
Fimmmenningarnir voru samtals sviptir frelsi í 9.942 daga. Miðað við að 600 milljónir séu til skiptanna þá verða greiddar um 60.000 krónur fyrir hvern dag sem mennirnir sátu í gæsluvarðhaldi.
Ef samningar nást þarf að setja sérstök lög um þá en gengið er út frá að um skattfrjálsar miskabætur verði að ræða. Fréttablaðið segir að lagt sé upp með að ljúka málinu með sátt og þá muni hinir sýknuðu afsala sér rétti til að sækja frekari bætur í gegnum dómstóla.
