Bríet Sunna Valdimarsdóttir, fyrrverandi kærasta Gísla Þórs Þórarinssonar, sem myrtur var aðfararnótt laugardags í norska bænum Mehamn, minnist hans í hjartnæmri Facebook-færslu sinni í dag. 

„Þú varst gæddur þessum einstöku persónu töfrum og ljóma. Þú sagðir alla hluti beint út án þess að særa neinn, það tóku allir mark á því sem þú sagðir og þú náðir til allra. Oft þegar ég var lítil í mér, þá hertir þú mig upp og minntir mig á að það sem mér fannst var það eina rétta, því þú sagðir alltaf við mig að ég væri með fallegasta hjartað í öllum heiminum og minntir mig alltaf á „að tala bara íslensku við fólk“ sem setti sig upp á móti mér og ekki láta neinn vaða yfir mig.“

Hún og Gísli Þór voru saman í 12 ár, en fram kemur í færslunni að Bríet sleit sambandi þeirra þar sem þau vissu bæði að sambandið gengi ekki upp vegna fjarveru. Þrátt fyrir sambandsslitin héldu þau áfram vinskap sínum.

Með færslunni deilir Bríet Sunna myndum af sér og Gísla Þóri og tveggja ára gamalli afmæliskveðju til hans, en í henni kemur fram hvernig þau kynntust og byrjuðu saman. Afmæliskveðjan lýsir að sögn Bríetar Sunnu staðnum sem Gísli Þór átti í hjarta hennar.

Bríet Sunna á von á sínu fyrsta barni í október og á föstudaginn talaði hún við Gísla Þór í hinsta sinn. „Þú varst svo ánægður þegar ég sagði þér að ég væri loksins ólétt því við gátum aldrei eignast barn en ákváðum bæði að sætta okkur við það og að lífið yrði samt æðislegt því við vorum saman,“ skrifar Bríet Sunna.

Í samtali þeirra óskar hann henni til hamingju með óléttuna: „btw til hamingju með strákinn.“ „Ég vissi ekki kynið þá,“ skrifar Bríet Sunna, en í gær kom í ljós að hún gengur með dreng. „Ég veit nú að strákurinn okkar Stefáns hefur besta og fallegasta verndarengil sem til er.“