Klukkutíma langt dauðastríð prússnesks hermanns við undirleik Sinfóníunnar
Einþáttungsóperan Stríð eftir Ragnar Kjartansson verður sett upp í samstarfi við Sinfóníuhljómsveit Íslands í Þjóðleikhúsinu vorið 2018. Í verkinu, sem var upphaflega sýnt í Volksbühne-leikhúsinu í Berlín í mars 2016 undir nafninu Krieg, fá áhorfendur að fylgjast með tilfinningaþrungnu og yfirgengilegu dauðastríði prússnesks 18. aldar hermanns í klukkustund, í rómantískri handmálaðri sviðsmynd og undir dramatískri óperutónlist eftir Kjartan Sveinsson.
Stríð er annað sviðsverkið sem Ragnar og Kjartan vinna í sameiningu. Síðast gerðu þeir Kraftbirtingarhljóm guðdómsins sem er byggt á Heimsljósi eftir Halldór Laxness. Verkið var einnig unnið fyrir Volksbühne-leikhúsið en síðar sett upp í Borgarleikhúsinu. Kraftbirtingarhljómur guðdómsins var leikaralaus óður til sviðsmyndarinnar, þess hluta leikhússins sem alltaf stendur í bakgrunni á bak við leikarana. En í Stríði er leikarinn stiginn inn í sviðsmyndina og sviðsljósinu er beint að honum, hinum klassíska leikara og leiknum. Í viðtali við DV í apríl í fyrra sagðist Ragnar vera að gera „myndlistarverk fyrir leikhús […] um leikhúsið í leikhúsinu.“
Í uppfærslunni á Stríði í Berlín var frumsamin tónlist Kjartans aðeins leikin í hljómflutningstækjum en í Þjóðleikhúsinu munu hljóðfæraleikarar úr Sinfóníuhljómsveit Íslands leika undir dauðastríðinu. „Við Kjartan vorum að vinna með óperuformið, vorum að gera þessa melódramatísku óperu. Það var því smá synd að hafa tónlistina bara á bandi. Kjartan samdi náttúrlega alla músíkina sérstaklega fyrir þetta. Svo kannski verður þetta einhvern tímann sett upp sem ópera með hljómsveit og öllu. Það væri svo skemmtileg andstæða, þessi svakalega tilfinningaþrungna samda tónlist og svo er gaurinn á sviðinu bara að emja yfir: „aaaaaahhhhhhhhhh.“ Mér finnst það mjög áhugavert,“ sagðir Ragnar í fyrra. Og nú er ljóst að ósk Ragnars mun verða að veruleika.