Tuttugu og fjögurra ára karlmaður í Wisconsin í Bandaríkjunum, Manuel Franco, datt heldur betur í lukkupottinn á dögunum þegar hann var með allar tölurnar réttar í Powerball-lottóinu vestan hafs.
Um er að ræða þriðja stærsta lottóvinning sögunnar í Bandaríkjunum, 768 milljónir dala.
Manuel sagði við bandaríska fjölmiðla að hann hafi fengið þá tilfinningu að hann yrði heppinn, daginn sem hann keypti miðann. Útdrátturinn fór fram þann 27. mars síðastliðinn og keypti Manuel nokkra tíu dollara miða umræddan dag. Hann trúði vart eigin augum þegar hann fór í gegnum miðana og sá að hann hefði unnið þann stóra.
Á blaðamannafundi sem haldinn var í gær þar sem Manuel var kynntur vildi hann ekki veita of miklar upplýsingar um persónulega hagi, eðlilega kannski. Hann viðurkenndi að hann hefði þó sagt upp í vinnunni, tveimur dögum eftir að hafa unnið þann stóra.
Þó að Manuel hafi unnið 768 milljónir dala í það heila valdi hann að fá eingreiðslu. Það þýðir að heildar upphæðin lækkar og fer niður í 477 milljónir dala, eða 326 milljónir eftir skatt. Manuel ætti þó að geta haft það þokkalegt á næstu árum enda fær hann sem nemur 39 milljörðum króna inn á bankareikninginn sinn.