„Litlikisi er tæplega sex ára högni og hann er týndur. Hann hefur ekki farið einsamall lengra en út á ruslatunnurnar bak við hús síðan hann var fimm mánaða. Það sem einkennir hann, fyrir utan litinn, er óvenjulega grannt skott.“
Þetta segir í stöðufærslu hjá Svanhildi Hólm Valsdóttur, aðstoðarmanni fjármálaráðherra og eiginkonu Loga Bergmanns. Hjónin eru í öngum sínum yfir týnda högnanum og biðja Vesturbæinga í nágrenni Melhagans að hafa augun hjá sér, með því kíkja í geymslur og bílskúra með von um að Litlikisi finnist.
Að sögn Svanhildar er Litlikisi enginn ævintýraköttur. Hann er örmerktur en gengur um götur ólarlaus og er sagður vera hræddur við allt. Því vonast Svanhildur að kötturinn hafi ekki farið langt en lesendur eru engu að síður hvattir til þess að líta vel í kringum sig. „Hann er með mjög lítið hjarta og fer aldrei neitt án mín og þá ekki meira en í sjö metra radíus frá mér, þannig að við skiljum ekkert,“ segir hún.
Stöðufærslu Svanhildar má sjá að neðan ásamt tilheyrandi myndum af högnanum og símanúmeri.
