Hörður Snævar Jónsson skrifar frá Peralada á Spáni:

Birkir Bjarnason fær fá tækifæri hjá félagi sínu, Aston Villa um þessar mundir. Liðið leikur í næst efstu deild á Englandi en Birkir er mest á bekknum.

Hann segir stöðuna ekkert sérstaka en lið Aston Villa hefur spilað vel undanfarið og stjóri liðsins því litlu breytt.

,,Staðan er ekkert sérstök eins og er, það er stutt eftir af tímabilinu og ég verð að halda mér klárum,“ sagði Birkir við fréttamann í dag þegar landsliðið hóf æfingar, undankeppni HM hefst á föstudag þegar liðið mætir Andorra.

Birkir segist hafa rætt málin við félagið en vill ekki fara út þá sálma

,,Ég ætla ekki að fara út í það núna,“ sagði Birkir sem finnst sérstakt að vera í þessari stöðu. ,,Mér finnst það mjög skrýtið, það verður bara að vera svona núna. Ég reyni að halda mér formi.“

Á dögunum gerðist atvik í leik Aston Villa, þar sem áhorfandi hljóp inn á völlinn og kýldi Jack Grealish, liðsfélaga Birkis. Á Englandi gerast svona atvik oft og óttast margir að stutt sé í að einhver hlaupi inn á völlinn með hníf.

,,Ég skil svo sem að það er ekki létt að stoppa heilan völl, þetta getur verið mjög hættulegt ef svona gerist of oft. Þeir verða þá að fara gera eitthvað í þessu.“