Það er rosalegur leikur í Meistaradeild Evrópu í kvöld þegar Liverpool heimsækir FC Bayern í Meistaradeld Evrópu. Um er að ræða síðari leik liðanna í 16 liða úrslitum.

Fyrri leiknum á Anfield lauk með markalausu jafntefli og því er allt opið fyrir einvígið í kvöld.

Bayern er erfitt heim að sækja en Liverpool tapar ekki oft og því er erfitt að lesa í leikinn.

Trent Alexander-Arnold bakvörður Liverpool er tæpur en vonast er til að hann geti tekið þátt í leiknum.

Gary Neville og fleri sérfræðingar hafa sagt að það væri gott fyrir Liverpool að tapa í kvöld og detta úr leik. Ástæðan sem þeir gefa sér að það gefi Liverpool meiri möguleika á að vinna ensku úrvalsdeildina.

,,Það er svo rosalega einfallt að sitja í myndveri og segja svona hluti, allir þessir sérfræðingar koma frá Manchester United,“ sagði Klopp þegar hann var spurður um málið og var lítið skemmt.

Klopp sagði vera ástæðu fyrir því að Neville og félagar væru í sjónvarpi en ekki að þjálfa.

,,Er það sem sagt þannig að það sé best að detta úr öllum bikarkeppnum strax? Þú gerir það og þá verða sömu menn brjálaðir.“

,,Við erum að nálgast seinni stigin í þessari keppni og á maður þá að fara að detta út án þess að reyna? Það er bara della, þetta er ein af ástæðum þess að þessir menn hafa ekki starf.“

,,Það er allt öðruvísi að stýra hlutum og tala um þá, þetta hefur gefið okkur peninga til að bæta okkur.“