Nú eru um fimm ár liðin frá því að flug MH370 frá Malaysia Airlines hvarf yfir Indlandshafi þegar vélin var á leið frá Kuala Lumpur Malasíu til Peking í Kína. Um borð í vélinni, sem var af gerðinni Boeing 777, voru 239 manns. Ekki er enn vitað hver örlög vélarinnar voru. Þrátt fyrir margra ára leit hefur lítið fundist af braki úr vélinni og fólk er engu nær um hvar hún gæti hafa endað för sína.

Nýlega fóru 50 ættingjar Kínverja, sem voru um borð í vélinni, til Kuala Lumpur til að minna á að fimm ár eru liðin frá hvarfi vélarinnar og til að þrýsta á yfirvöld í Malasíu um að halda áfram leit að vélinni.

Áströlsk yfirvöld stýrðu leitinni árum saman og var leitað á 120.000 ferkílómetra svæði í Indlandshafi en án árangurs. Leit var hætt í janúar 2017. Það litla brak sem hefur fundist úr vélinni fannst á eyjunni Reunion og nokkrum öðrum eyjum við austurströnd Afríku.

Í skýrslu frá því í júlí á síðasta ári kemur fram að stefnu flugvélarinnar hafi verið breytt handvirkt af einhverjum um borð en í skýrslunni var ekki hægt að skera frekar úr um hvað gerðist eða hver var að verki. Rannsókn á bakgrunni áhafnarinnar og farþega hefur ekki leitt neitt í ljós.

„Að svona stór flugvél geti horfið sporlaust í dag er óskiljanlegt.“

Hefur CNN eftir Muguel Marin hjá Air Navigation Bureau.