Yfirvöld í Rússlandi ætla að bregðast við neyðarástandi sem skapast hefur vegna hvítabjarna við Novaya Zemlya-eyjaklasann í Norður-Íshafi. Rúmlega 50 hvítabirnir hafa komið sér vel fyrir í Belushya Guba, einni helstu byggð eyjaklasans, þar sem þeir hafa setið um híbýli fólks, rótað í rusli og jafnvel ráðist á íbúa.

Yfirvöld í Moskvu hafa í hyggju að senda viðbragðsaðila á vettvang sem munu deyfa dýrin og flytja þau á brott. Vonast er til þess að það muni duga til að halda þeim frá, í bili að minnsta kosti. Ísbjarnaveiðar eru bannaðar í Rússlandi og því verða dýrin ekki drepin.

Eins og sést á meðfylgjandi myndum og myndbandi eru íbúar ekki beint í eftirsóknarverðri stöðu. Margir veigra sér við að fara út úr húsi enda eru birnirnir hungraðir og í leit að fæðu. Foreldrar hafa ekki sent börn sín í skólann sem þarf svo sem ekki að koma á óvart.

Mikhail Stishov, fulltrúi hjá Arctic biodiversity, segir við rússneska fjölmiðla að þessi staða ætti ekki að koma neinum á óvart. Birnirnir leiti á land vegna þess að hafísbreiður, sem þeir venjulega halda sig á, eru ekki til staðar. Þá leita birnirnir á staði þar sem æti er að finna, oftar en ekki í og við mannabústaði.