Grindavíkurbær hyggst hækka laun þeirra hópa sem lægst laun hafa í sveitarfélaginu, einhliða, en Samband íslenskra sveitarfélaga fer með samningsumboðið vegna launakjara.  Sviðsstjóra Grindavíkurbæjar hefur verið falið að vinna málið áfram eftir að bæjarfulltrúar sammæltust um þessa ákvörðun á bæjarráðsfundi. Fréttablaðið greinir frá.

„Við teljum þá lægst launaða sem eru starfsmenn í íþróttahúsi Grindavíkur og starfsmenn leikskóla. Þetta er gert í samvinnu allra stjórnmálaflokka í bænum og er í stefnuyfirlýsingu meirihlutans að bæta kjör þessa fólks.“

segir Hjálmar Hallgrímsson, formaður bæjarráðs og nefnir að um misræmi í launum hafi verið að ræða. Hann veit ekki hversu margir fá launahækkun og veit því ekki hvað hækkunin mun kosta bæjarfélagið, en það komi í ljós á næsta  bæjarráðsfundi.

Samband íslenskra sveitarfélaga fer með umboð sveitarfélaga til að semja um laun starfsmanna þeirra. Mörg sveitarfélög hafa hinsvegar bent á að þegar farið er fram á launahækkanir innan einstakra sveitarfélaga, hafi þau sveitarfélög ekki umboð til að samþykkja slíkar kröfur. Hjálmar segist vona eftir að það leysist:

„Samband sveitarfélaga semur fyrir hönd sveitarfélagsins og því þurfum við líklega að fá umsögn frá þeim en við erum með ákveðnar kröfur sem við leggjum á móti þó þær séu nú litlar, þannig að allir vinna.“