Fyrsta þáttaröðin af spennuþáttunum True Detective vakti verðskuldaða athygli og var að margra mati besta þáttaröð ársins 2014. Önnur þáttaröðin, sem fór í loftið árið 2015, þótti ekki heppnast jafn vel en þrátt fyrir það eru framleiðendur þáttarins, HBO, með þriðju þáttaröðina í bígerð.

Independent greindi frá því á dögunum að Matthew McConaughey, sem fór á kostum í fyrstu seríunni, sé tilbúinn að leggja fram krafta sína verði handritið gott. Hann og Woody Harrelson þóttu sýna stórleik þegar þeir túlkuðu rannsóknarlögreglumennina Martin Hart og Rustin Cohle sem rannsökuðu morð á fyrrverandi vændiskonu. Í annarri þáttaröðinni fóru Vince Vaughn, Rachel McAdams og Colin Farrell með aðalhlutverkin.

Matthew var gestur í spjallþætti Rich Eisen‘s á dögunum og þar barst talið að þriðju þáttaröð True Detective. Þegar Matthew var spurður hvort hann gæti hugsað sér að snúa aftur í þættina sagði hann: „Ef handritið verður vel skrifað og það myndi standa til boða, þá myndi ég ekki hika í eina sekúndu.“

Óvíst er þó hvort af þessu verður og þá hvernig útfærslan yrði. Casey Bloys, einn af yfirmönnum HBO, sagði á blaðamannafundi fyrir skemmstu að þriðja serían væri á teikniborðinu. Sagðist hann hafa rætt við Nic Pizzolatto, handritshöfund þáttanna, um málið og báðir væru þeir spenntir fyrir verkefninu. Óvíst er þó hvenær tökur hefjast en úr því sem komið er þurfa aðdáendur líklega að bíða til ársins 2018.