Nýlega ók Lauren Smith á um 100 km/klst eftir tvöfaldri hraðbraut nærri Colchester á Englandi. Skyndilega fékk hún flogakast en slíkt hafði hún aldrei fengið áður. Átta ára sonur hennar, Ben Hedges, sat í framsætinu og áttaði sig strax á að eitthvað hafði komið fyrir móður hans. Hann stökk því til og greip í stýrið og stýrði bílnum út af veginum og náði að stöðva hann þar án þess að þau meiddust.

Í umfjöllun Daily Mail um málið kemur fram að Lauren hafi skyndilega byrjað að skjálfa þegar hún sat undir stýri á Ford Ka bílnum. Bílinn lenti utan í vegriðinu, sem skilur akstursstefnur að, þegar hún missti síðan meðvitund. Á myndbandsupptökunni hér fyrir neðan, sem var tekin úr bíl sem var ekið á eftir bíl mæðginanna, sést hvernig Ben stýrir bílnum út af akbrautinni og út á gras við hlið hennar þar sem bílinn stöðvast síðan. Það er einnig athyglisvert hversu vel vakandi aðrir ökumenn voru greinilega og áttuðu sig á að ekki var allt í lagi í bíl mæðginanna og færðu sig frá til að Ben gæti komið bílnum út af veginum. Margir stöðvuðu síðan til að aðstoða mæðginin. Snarræði Ben var svo mikið að hann náði einnig að kveikja á neyðarljósum bílsins.

Lauren, sem er 28 ára, var flutt á sjúkrahús en hún er á batavegi. Þetta var í fyrsta sinn sem hún fékk flogakast og fyrir vikið eru viðbrögð og snarræði Ben jafnvel enn merkilegri. Lauren er að vonum þakklát fyrir snarræði Ben.

„Ég ók mjög óreglulega í um eina mínútua og síðan hrundi ég fram á stýrið, sleppti því og missti algjörlega meðvitund, höfuð mitt lá á stýrinu.“

Sagði hún um afrek Ben.

Fótur hennar virðist hafa runnið af bensíngjöfinni því bíllinn hægði jafnt og þétt á sér og var gangur hans ansi skrykkjóttur enda í fimmta gír.

Mæðginin meiddust ekkert.