Ellý Ármanns mætir alla þriðjudagsmorgna með tarot spilin sín í þáttinn Ísland vaknar á K100. Þar svarar hún hlustendum þáttarins og skyggnist bæði í framtíð og fortíð þeirra.

Ellý hefur mætt í nokkur skipti, en í þessari viku ætlaði allt um koll að keyra og símkerfi K100 fór næstum á hliðina. Ástæðan: Ellý reyndist einstaklega sannspá í spám sínum.

„Ég hef aldrei heyrt eða séð annað eins,“ sagði Jón Axel Ólafsson einn þáttastjórnenda, en hann sér um þáttinn ásamt Ásgeiri Páli Ágústssyni og Kristínu Sif Björgvinsdóttur.

Veikindi, brúðkaup, fjármál, góð heilsa, sjálfsrækt, sambönd, hlátur og fleira bar á góma í spádómum Ellýjar.

Á meðal þeirra sem hringdu inn var ung kona, en hún og maður hennar hafa verið að reyna að eignast barn. Hún hafði þó ekki minnst á barneignatilraunir sínar einu orði í símtalinu þegar Ellý sagðist sjá nýtt líf í spilunum við mikinn fögnuð þeirra sem heyrðu. „Það er eitthvað alveg einstakt við að spá fyrir fólki á þessum tíma dags, þegar það er nývaknað,” sagði Ellý eftir þáttinn.