Um daginn hélt myndlistamaðurinn Ísak Marvins sína fyrstu einkasýningu í heimabæ sínum, Grundarfirði. Hann var hinsvegar ekki lengi að skapa nóg af efni í aðra einkasýningu sína, sem verður haldin á morgun í Ánanausti 11.

,,Sum verk verða örugglega ennþá að þorna á sýningunni,” segir Ísak.

Fyrir utan málverk verður Ísak líka með teikningar til sýnis. ,,Mig langar að sýna hvernig ég skissa og vinn hugmyndir.”

En hvernig kom nafnið á sýningunni til: ,,listamaður undir striga”?

,,Þegar ég var 14 ára og var að kaupa minn fyrsta striga með pabba og stjúpmömmu minni, þá var striginn svo stór að ég þurfti að halda á honum yfir höfðinu á mér með bræðrum mínum, í aftursætinu á leiðinni heim.“

Þó Ísak elski augljóslega það sem hann er að gera, eða maður myndi halda það þar sem hann er að halda tvær einkasýningar í sama mánuðinum, þá þýðir það ekki að það sé ekki gríðarlega mikil vinna sem fer í að vera myndlistamaður. ,,Ég hætti ekki að mála. Ég er 6-10 klukkustundir á dag að mála, pæla og gera eitthvað í kringum sýninguna.”

Fyrir utan það er Ísak svo í tveggja ára diplómanámi í Myndlistaskóla Reykjavíkur, hann segir að kennararnir þar séu sem betur fer skilningsríkir upp á slaka mætingu nemenda ef þeir eru að halda listasýningar á eigin vegum.

Sýningin er opin 23-25. nóvember fyrir áhugasama listunnendur.