Cristopher Precopia, karlmaður í Texas í Bandaríkjunum, var heldur ringlaður þegar lögreglumenn handtóku hann ekki alls fyrir löngu. Precopia vissi ekki til þess að hann hefði gert neitt af sér en fékk áfall þegar lögregla sagði honum hvað hann væri grunaður um.
Þannig er mál með vexti að nokkru fyrir handtökuna var ráðist á fyrrverandi kærustu hans með hrottalegum hætti. Brotist var inn á heimili hennar og hún skorin illa. Skildi árásarmaðurinn meðal annars eftir X á bringu hennar sem hann hafði skorið með dúkahníf.
Precopia reyndi hvað hann gat að hugsa hvar hann hefði verið þennan örlagaríka dag – því eitt væri víst. Hann hefði hvergi komið nálægt hinni hrottalegu árás.
Precopia mundi að þennan dag var hann ekki einu sinni verið í bænum. Hann var á hóteli með móður sinni og fleirum í um 100 kílómetra fjarlægð frá heimili fyrrverandi kærustu sinnar.
Þennan dag hafði Precopia tekið myndir, sjálfsmyndir meðal annars, og birt á samfélagsmiðlum.
Níu mánuðum eftir handtökuna ákváðu saksóknarar að fella málið gegn honum niður – og var ástæðan sú að myndirnar voru sannarlega teknar þennan dag og því var Precopia ekki nálægt árásarstaðnum. Hefði hann verið fundinn sekur hefði hann getað átt yfir höfði sér 99 ára fangelsi. Sérfræðingar rannsökuðu myndirnar og komust að því að þær hefðu verið teknar þennan dag auk þess sem lögregla ræddi við fjölda fólks sem var með honum þennan dag.
Ekki liggur fyrir hvaða sönnunargögn lögregla hafði gegn honum – ef einhver – til að byrja með og hefur lögregla ekki fengist til að tjá sig um málið.