Edmund Zagorski, fangi á dauðadeild í Tennessee, hefur farið þess á leit að hann verði tekinn af lífi í rafmagnsstól en ekki með banvænni sprautu eins og stendur til.
Zagorski situr á dauðadeild vegna tveggja morða árið 1983 og verður hann tekinn af lífi á fimmtudag. Umræða um þau lyf sem notuð eru til að framfylgja dauðarefsingum hefur verið fyrirferðamikil að undanförnu. Vilja sumir sérfræðingar meina að lyfin sem notuð eru valdi föngum gríðarlegum kvölum sem líkja megi við pyntingar. Hefur verið bent á að þessi aðferð brjóti í bága gegn áttundu grein bandarísku stjórnarskrárinnar sem leggur bann við óvenjulegum og grimmilegum refsingum.
Á þessum forsendum fór Zagorski fram á að fá frekar rafmagnsstólinn. Fangar, sem hafa verið á dauðadeild í Tennessee, síðan fyrir árið 1999 geta valið um að deyja með banvænum lyfjakokteil eða í rafmagnsstólnum. Lögmaður Zagorski segir að skjólstæðingur sinn vilji frekar seinni kostinn. Af tveimur slæmum kostum sé hann betri.
„Að kveljast í 10 til 18 mínútur, upplifa eins og maður sé að drukkna, kafna og brenna lifandi er skelfilegt,“ segir lögfræðinguinn, Kelley Henry.
Flest bendir til þess að Zagorski verði líflátinn með rafmagnsstólnum, en það gerðist síðast í Virginíu í Bandaríkjunum árið 2013.