Michael Ketterer tók þátt í þrettándu þáttaröð America´s Got Talent sem lauk fyrir stuttu,  og var flutningur hans svo tilfinningaríkur í einum þættinum að hinn eitilharði Simon Cowell beygði af.

Úrslitaþátturinn var 19. september síðastliðinn og lenti Ketterer í fimmta sæti. Daginn eftir var hann handtekinn í Hollywood eftir að hafa lent í rifrildi við eiginkonuna á hótelherbergi þeirra. Sáust áverkar á konunni.

Ketterer ber því við að allt hafi þetta verið „misskilningur“ og að eiginkona hans hafi ekki viljað leggja fram kæru. Hann var kærður fyrir heimilisofbeldi og þurfti að leggja fram tryggingu að fjárhæð 50 þúsund dollarar.

Simon Cowell tók ástfóstri við Ketterer í þáttunum og var búinn að mæla með því að söngvarinn Garth Brooks myndi taka Ketterer undir sinn verndarvæng og jafnvel vinna að tónlist í samstarfi við hann.