Um miðjan dag í gær varð 8 ára dóttir Helgu Brynju Tómasdóttur, íbúa í Garðabæ fyrir því að ungur maður elti hana uppi og rassskellti. Stúlkan sem var á gangi með hundinn sinn um hverfið kom grátandi heim og var að sögn Helgu í miklu uppnámi. Helga sagði frá árásinni á Facebook-síðunni Garðabær-íbúar og biðlar til foreldra í bænum að vera á varðbergi.

„Hún var rölta um Akrarhverfið þegar hún mætir ungum dreng á aldrinum 15-17 ára. Drengurinn virtist eðlilegur en þegar að hann mætir henni og fer fram hjá þá rassskellir hann hana,“ segir Helga í samtali við DV.

Þegar stúlkan kom heim brotnaði hún saman. „Hún kemur heim og virðist vera í lagi, ég spyr hvernig var göngutúrinn og þá brotnar hún saman, fer að gráta og segir mér frá því hvað gerðist. Ég skoðaði hana strax og hún var rauð efir höggið. Það vekur hjá mér ugg að svona gerist á miðjum degi um há sumar,“ segir Helga.

Hún hafði samband við lögreglu sem gat lítið aðhafst í málinu. „Ég hringi strax í þjónustuver lögreglunnar sem tjáir mér að lítið sé hægt að gera þar sem töluverður tími er liðinn frá atburðinum. Í kjölfarið fer ég strax og skrifa færslu á Facebook-síðu Garðabæjar.“

Helga segir mikilvægt að bæjaryfirvöld bregðist við og setji upp eftirlitsmyndavélar í bæinn. „Bæjarbúar eru mjög skelkaðir og nú er umræðan orðin mjög sterk um eftirlitismyndavélar. Ég tel að það væri góð lausn. Þetta verður að leysa og myndavélar gætu upprætt þennan óskapnað,“ segir Helga að lokum.