Það sem voru græn engi fyrir ári er nú brúnar eyðimerkur, eða því sem næst. Svona er staðan í Nýju Suður–Wales í Ástralíu en þar hefur veturinn, nú er vetur þar, verið sá þurrasti í 50 ár. Ástandið er svo slæmt að yfirvöld hafa veitt bændum heimild til að skjóta kengúrur til að draga úr samkeppni húsdýra og kengúra um mat.

Ef ekki fer að draga úr þurrkunum neyðast margir bændur til að fella bústofn sinn. Júní, júlí og ágúst eru yfirleitt rigningarmánuðir í Ástralíu en þennan veturinn er staðan allt önnur. Vatnsból hafa þornað upp og sífellt verður lengra á milli polla. Þetta hefur að sjálfsögðu áhrif á dýraríkið og í júlí streymdu kengúrur inn í miðborg Canberra til að finna mat og vatn. Þar komu þær sér síðan fyrir í görðum, á knattspyrnuvöllum og öðrum stöðum.

Tæplega 10 millimetra úrkoma hefur mælst í stórum hlutum Nýju Suður-Wales undanfarin mánuð að sögn Sky.