Frá því á miðnætti hefur rennsli við Sveinstind farið lækkandi en það mælist nú um 1400 m³/s. Rennsli fer enn hækkandi í Eldvatni við Ása og vatn flæðir út í Eldhraun. Þetta kemur fram í tilkynningu frá Veðurstofunni um Skaftárhlaup. Þar segir að búast megi við að það dragi jafnt og þétt úr hlaupinu en nokkrir sólarhringar muni líða þar til rennslið í Skaftá verði eðlilegt.

Á mælitækjum Veðurstofunnar hefur mælst órói sem bendir til að suða sé hafin í jarðhitakerfinu undir jöklinum vegna þrýstingslækkunar. Það má því gera ráð fyrir að Eystri-Skaftárketill sé að tæmast.

Tilkynningar hafa borist um brennisteinslykt á Suðausturlandi, til dæmis í Meðallandi og Öræfum. Í gær fannst sterk lykt vestan Skaftársjökuls þegar farið var í eftirlitsflug með Landhelgisgæslunni.