Kristján Flóki Finnbogason spilaði í dag sinn fyrsta leik fyrir lið Brommapojkarna í Svíþjóð.

Kristján skrifaði undir samning við Brommapojkarna á dögunum en hann kemur á láni frá Start í Noregi.

Framherjinn fékk ekki mikið að spila hjá Start og fær nú tækifæri til að sanna sig í sænsku fyrstu deildinni.

Brommapojkarna vann mikilvægan 2-1 sigur á Dalkurd í dag en Kristján kom inná sem varamaður í síðari hálfleik.

Íslendingurinn jafnaði metin í 1-1 stuttu eftir að hafa komið inná og skoraði Brommapojkarna svo sigurmark undir lokin eftir innkomu Kristjáns.

Sigurinn er afar mikilvægur fyrir liðið sem situr í fallsæti þegar 16 umferðir eru búnar í deildinni.