Hinn umdeildi breski aktívisti og íslams-gagnrýnandi Tommy Robinson vann sigur í morgun í áfrýjunarmáli vegna dóms sem hann hlaut í vor fyrir óvirðingu við réttinn. Tommy Robinson var dæmdur í 13 mánaða fangelsi eftir að hann lét mynda sig fyrir utan dómshús í Leeds auk þess að mynda sakborninga er þeir komu til dómshússins og sýndi í beinni útsendingu á Facebook-síðu sinni. Er talið að um 250.000 manns hafi horft á útsendinguna.
Fréttahömlur voru í gildi á umræddu dómsmáli þar sem talin var hætta á því að umfjöllun gæti haft áhrif á kviðdómendur. Sakborningar voru allir íslamskir karlmenn sakaðir um að hafa misnotað fjölda breskra stúlkna kynferðislega. Gífurlega mörg mál af slíku tagi hafa komið upp á Bretlandi síðustu ár þar sem hópar íslamskra manna, oftast Pakistana, hafa með mjög skipulögðum hætti misnotað unglingsstúlkur og stúlkubörn niður í 11 ára gömul. Tommy Robinson hlaut 10 mánaða fangelsisdóm fyrir umrætt brot auk þess sem þriggja mánaða skilboðsbundinn dómur yfir honum vegna sambærilegs brots í fyrra bættist við.
Dómsúrskurðurinn í morgun er á þá leið að ekki hafi verið sýnt fram á Tommy Robinson hafi skaðað réttarhöldin og sýnt dómnum óvirðingu. Er jafnframt úrskurðað að réttað skuli á ný í málinu. Það eru slæmu fréttirnar fyrir Tommy Robinson sem gæti orðið fundinn sekur á ný.
Tommy Robinson hefur lengi verið afar umdeildur vegna baráttu sinnar gegn íslömskum öfgaöflum á Bretlandi. Hefur hann verið sakaður um að ýta undir fordóma gegn múslimum. Stuðningur við hann víða um heim eftir fangelsun hans í vor hefur hins vegar reynst mjög víðtækur og komið mörgum á óvart. Meðal helstu stuðningsmanna hans eru formaður UKIP, Gerard Batton. Aðilar nátengdir Donald Trump Bandaríkjaforseta hafa líka talað máli hans gagnvart breskum yfirvöldum. Fjölmargir mótmælafundir honum til stuðnings hafa verið haldnir og í fjölmennustu mótmælunum er talið að allt að 15.000 manns hafi tekið þátt.
