Tveir karlar og kona hafa verið ákærð fyrir að hafa beitt karlmann á fertugsaldri ofbeldi og nauðgað honum í húsi í Eidskog sem er austan við Osló í Noregi. Þetta gerðist í desember 2016. Karlarnir eru á þrítugs- og fimmtugsaldri en konan er á þrítugsaldri.

TV2 segir að fólkið sé allt ákært fyrir ofbeldisbrot gegn manninum. Hann var sleginn í andlitið, höfuðið og bringu. Hin ákærðu eru sögð hafa notað hnúajárn og kústskaft við ofbeldið.

Konan og yngri maðurinn eru ákærð fyrir kynferðisbrot með því að hafa neytt manninn til að liggja á fjórum fótum. Síðan er konan sögð hafa ýtt kústskafti upp í endaþarm hans.

Norska lögreglan komst á snoðir um málið þegar hún aðstoðaði sænsku lögregluna við rannsókn á grófri nauðgun sem átti sér stað í Charlottenberg í Svíþjóð, nærri norsku landamærunum.

Konan, sem er ákærð í norska málinu, var dæmd í tveggja ára fangelsi fyrir málið í Svíþjóð.