Hafði verið saknað síðan í lok júní
Sænski auðkýfingurinn Christer Ericsson fannst látinn um helgina, tveimur mánuðum eftir að hvarf.
Ericsson hafði verið saknað síðan 27. júní, en þá fannst mannlaus bátur í hafinu fyrir utan Gautaborg. Strax vöknuðu grunsemdir um að Ericsson hefði verið um borð og það fékkst síðar staðfest.
Talsmaður lögreglu, Thomas Fuxborg, staðfesti á laugardag að líkið sem fannst væri af Ericsson. Fannst það skammt frá þorpinu Marstrand í sveitarfélaginu Kungälv af fólki sem átti leið um. The Local í Svíþjóð greinir frá þessu.
Að sögn lögreglu bendir ekkert til þess að eitthvað saknæmt hafi átt sér stað og virðist Ericsson hafa látist af slysförum.
Sem fyrr segir hafði Ericsson verið saknað síðan 27. júní, en síðar þann sama dag fannst mannlaus bátur á reki. Mikil leit var gerð í kjölfarið sem bar engan árangur.
Ericsson, sem hlaut viðurnefnið Gulldrengurinn á níunda áratug liðinnar aldar, var frumkvöðull og farsæll kaupsýslumaður. Hann þróaði til að mynda nýja aðferð við að flytja gáma í og af fragtskipum. Hann stofnaði síðar eigið fyrirtæki, Consafe, sem byggði meðal annars íbúðir fyrir starfsmenn olíuborpalla. Undir það síðasta var Ericsson fyrirferðamikill í rekstri fyrirtækja í upplýsingatækni og skyldum greinum.