„Ég er ótrúlega hissa á að við skulum verða vitni að svona samningum árið 2016,“ sagði Bjarni Benediktsson fjármálaráðherra í kvöldfréttum RÚV.
Hópur sem telur um tuttugu starfsmenn eignarhaldsfélagsins Kaupþings getur fengið úthlutað samtals tæplega 1.500 milljónum króna í bónus sem verður greiddur út ekki síðar en í lok apríl 2018.

DV greindi frá málinu á þriðjudag en í frétt blaðsins kom fram að um er að ræða sömu starfsmenn að stórum hluta og fengu greiddan bónus upp á tugi milljóna króna samtímis því að Kaupþing lauk nauðasamningum um síðastliðin áramót.

Núna eiga þeir hins vegar í vændum enn frekari bónusgreiðslur – og mun hærri – takist þeim að ná tilteknum markmiðum sem miða að því að hámarka virði óseldra eigna Kaupþings og þar með endurheimtur kröfuhafa félagsins. Í sumum tilfellum geta starfsmenn fengið um og yfir 100 milljónir króna í sinn hlut, eins og DV hefur heimildir um. Verðmætasta eign Kaupþings er 87% hlutur félagsins í Arion banka.

Bjarni sagði í fréttum RÚV í kvöld slíkir samningar væru mjög óeðlilegir árið 2016. Hann sagði orðrétt: „Ég er ótrúlega hissa á að við skulum verða vitni að svona samningum árið 2016. Þegar maður skoðar hvernig þetta fyrirtæki hefur orðið til, meðal annars fyrir milligöngu dómstóla vegna þess að menn gátu ekki staðið við skuldbindingar sínar, og sér það hvernig þessu fyrirbæri er stjórnað og hverjir eru hluthafar þarna, og sér síðan að samningar eru gerðir við lykilstjórnendur um að menn geti fengið allt að 100 milljónir í bónus, þá finnst manni allt þetta fyrirbæri sem Kaupþing er, og þessir samningar, hreinlega lykta af sjálftöku. Það er ekkert hægt að komast hjá því.“

Í umfjöllun DV á þriðjudag kom fram að tillaga að bónuskerfi fyrir starfsmenn Kaupþings verði lögð til samþykktar fyrir aðalfund sem fram fer þann 30. ágúst næstkomandi. Umrætt bónuskerfi mun gilda til loka fyrsta ársfjórðungs 2018 og kveður á um að starfsmenn og tilteknir verktakar félagsins, sem einkum starfa á skrifstofu Kaupþings í London, sem verða hluti af bónuskerfinu geta að hámarki fengið 9,3 milljónir sterlingspunda, eða tæpan einn og hálfan milljarð króna, í bónusgreiðslur.

Samkvæmt starfskjarastefnu félagsins sem DV hefur undir höndum, og verður lögð til samþykktar þann 30. ágúst, mun bónuskerfið ekki ná til stjórnar og annarra æðstu stjórnenda Kaupþings. Mögulega verði þó komið upp sérstöku bónuskerfi fyrir þá síðar meir.