Félagið ISS Ísland, langsamlega stærsta fyrirtækið á ræstingarmarkaði hér á landi með á fjórða milljarð króna í veltu á ári, var sett í söluferli fyrr í þessum mánuði. Það er fyrirtækjaráðgjöf Kviku banka sem hefur verið ráðin til að hafa umsjón með sölumeðferð ISS á Íslandi, samkvæmt heimildum DV. Allt hlutafé félagsins er í eigu alþjóðlegu fyrirtækjasamsteypunnar ISS A/S sem er með höfuðstöðvar í Danmörku.

Starfsemi ISS á Íslandi lýtur að ræstingum, mötuneytisþjónustu og annarri fasteignaumsýslu en félagið hefur verið í eigu ISS A/S allt frá síðustu aldamótum þegar ISS-Danmark keypti Ræstingar ehf., dótturfyrirtæki Securitas. Hagnaður félagsins á árinu 2014, en fyrirtækið hefur ekki skilað inn reikningi fyrir síðasta rekstrarár, nam tæplega 162 milljónum króna eftir skatta. Tekjur ISS á Íslandi hafa aukist um liðlega einn milljarð á síðustu fimm árum og námu tæplega 3,2 milljörðum á árinu 2014 en samtals starfa um 720 manns hjá fyrirtækinu.

Guðmundur Guðmundsson, forstjóri ISS á Íslandi, vildi í samtali við DV ekkert tjá sig um söluferlið þegar eftir því var leitað. Alþjóðafyrirtækið ISS A/S, móðurfélag ISS Ísland ehf., er með starfsemi í 53 löndum og er einn stærsti einkarekni atvinnurekandi í heimi með yfir 500 þúsund starfsmenn.

ISS Ísland hefur talsvert sterka stöðu á þessum markaði gagnvart sínum helstu keppinautum. Þannig kom meðal annars fram í úttekt Viðskiptablaðsins í september í fyrra að tekjur félagsins hefðu numið um 66% af heildarveltu þriggja stærstu ræstingarfyrirtækjanna. Þá er arðsemi rekstrar ISS á Íslandi mun meiri en í samanburði við sína helstu samkeppnisaðila – Hreint og Sólar – en hlutfall hagnaðar af tekjum fyrirtækisins var rúmlega 5% á árinu 2014 á meðan EBITDA-framlegð var um 7,5%. Mörg af stærstu fyrirtækjum og stofnunum landsins kaupa ræstingarþjónustu sína af ISS á Íslandi.

Fyrirtækið skilaði liðlega 140 milljóna króna EBITDA-hagnaði – afkoma fyrir fjármagnsliði og afskriftir – á árinu 2014 og jókst hann um ríflega 30 milljónir frá fyrra ári. Eigið fé ISS Ísland var tæplega 1.680 milljónir króna í lok árs 2014 en félagið hefur ekki stofnað til neinna skuldbindinga við lánastofnanir. Launakostnaður var um 2,4 milljarðar króna sem þýðir að um 75% af öllum rekstrartekjum fyrirtækisins fer í að standa straum af launum og launatengdum gjöldum.