Staðfest hefur verið að þrír létust í öflugum jarðskjálfta sem reið yfir Osaka í Japan í morgun að staðartíma. Skjálftinn reið yfir á annatíma á mánudagsmorgni þegar fólk var á leið til vinnu. Ferðum neðanjarðarlesta og hraðlesta var aflýst í kjölfar skjálftans.

Yfirvöld segja að níu ára stúlka hafi látist í skjálftanum og tveir karlmenn á áttræðisaldri. Hann reið yfir um klukkan 8 að staðartíma og mældist 6,1 stig. Margir húsveggir hrundu í skjálftanum og eldar kviknuðu. Að minnsta kosti 41 slasaðist.

Yfirvöld segja að engin hætta sé á flóðbylgju í kjölfar skjálftans.

Uppfært klukkan 06.25

Erlendir fjölmiðlar segja að nú hafi verið staðfest að rúmlega 200 manns hafi slasast í skjálftanum.