Fyrir nokkrum vikum varð tóbaksfíknin farþega í flugvél frá SAS að falli og hann fór inn á salerni flugvélarinnar og kveikti í sígarettu. Vélin var á leið frá Stokkhólmi til Malaga á Spáni. Þegar hann var búinn að reykja henti hann sígarettustubbnum í ruslatunnuna á salerninu en glóð logaði enn í sígarettunni.

Farþegar sem ætluðu á salernið á eftir manninum fundu reykjarlykt og létu flugliða vita. Sem betur fer kviknaði ekki í vélinni en ekki þarf að fjölyrða um þá hættu sem getur myndast ef eldur kemur upp í flugvél.

Flugvirkjar þurftu að fara vel yfir vélina þegar hún var lent í Malaga til að tryggja að ekkert væri að henni. Allt hafði þetta mikinn kostnað í för fyrir SAS sem þurfti meðal annars að greiða gistingu fyrir 120 farþega sem ætluðu með flugvélinni til Stokkhólms þennan sama dag. Einnig þurfti að skipta um áhöfn vélarinnar.

Farþeginn hefur nú fengið reikning frá SAS eftir því sem segir í umfjöllun Flysmart24.no. Hann hljóðar upp á sem nemur um 2,3 milljónum íslenskra króna enda ekki ódýrt að kaupa hótelgistingu fyrir 120 manns og seinka brottför flugvélar um sólarhring.. Þetta er hæsta skaðabótarkrafa sem SAS hefur gert vegna svona máls.