Frá því að sektir fyrir að nota farsíma án handfrjáls búnaðar áttfölduðust þann 1. maí síðastliðinn hefur lögrelgan á höfuðborgarsvæðinu gómað 173 ökumenn fyrir brotið. Þetta kemur fram í tilkynningu sem lögreglan sendi frá sér á Facebook.

Eftir hækkunina nemur sektin fyrir brotið 40 þúsund krónum. Lögreglan á höfuðborgarsvæðinu hefur því gefið út sektir fyrir tæpar sjö milljónir frá því lögunum var breytt.

„Núna hafa verið gefnar út 173 sektir fyrir notkun farsíma – 40.þúsund krónur hver. Það er alltof mikið – vonandi fara ökumenn að læra af þessu,“ segir í tilkynningu frá lögreglu.

Sektin fyrir að nota farsíma án handfrjáls búnaðar er ekki eina sektin sem hækkaði þann 1. maí. Sekt fyrir að keyra yfir á rauðu ljósi hækkaði sömuleiðis úr fimmtán þúsund krónum í þrjátíu þúsund. Þá hefur sektin fyrir að keyra á yfir hundrað og sextíu kílómetra hraða þar sem hámarkshraði er 90, hækkað úr 150 þúsundum í tvö hundruð og fjörutíu þúsund.