Enska knattspyrnuliðið Arsenal er meðal ríkustu knattspyrnufélaga heims. Það gerði nýverið auglýsingasamning við yfirvöld í Afríkuríkinu Rúanda sem greiða Arsenal háar fjárhæðir fyrir að láta „Visit Rwanda“ standa á ermum liðsbúnings liðsins. Þetta hefur verið harðlega gagnrýnt en Rúanda er nítjánda fátækasta ríki heims, samkvæmt lista Sameinuðu þjóðanna, og þykir mörgum sem hægt væri að nota peningana í eitthvað skynsamlegra en auglýsingasamning við ríkt knattspyrnulið.

Það eykur enn á óánægju margra Breta með samninginn að Rúanda fær árlega sem svarar til um 10 milljarða íslenskra króna í þróunaraðstoð frá Bretum. Bent hefur verið á að þarna séu breskir skattgreiðendur að greiða til stöndugs knattspyrnuliðs í Lundúnum.

Ekki má gleyma að forseti Rúanda, Paul Kagame, er eldheitur stuðningsmaður Arsenal. Það kemur því kannski ekki á óvart að í samningnum er kveðið á um að Kagame og nánustu ættingjar hans fá fyrirmennastúku til ráðstöfunar þegar þeir mæta á leiki Arsenal í Lundúnum. Kagame hefur nánast einkarétt á öllu pólitísku valdi í Rúanda en hann hefur stýrt landinu í 17 ár. Í kosningunum á síðasta ári fékk hann 98 prósent atkvæða. Hann keyrði einnig nýlega í gegn stjórnarskrábreytingu sem gerir honum kleift að sitja á forsetastól til 2034.

Human Rights Watch og Sameinuðu þjóðirnar hafa margoft gagnrýnt yfirvöld í Rúanda fyrir brot gegn mannréttindum.

Hörð gagnrýni hefur komið fram á samninginn þrátt fyrir að yfirvöld í Rúanda og talsmenn Arsenal segi að peningarnir komi ekki frá breskri þróunaraðstoð enda sé hún eyrnamerkt ákveðnum verkefnum. Markmið samningsins sé að fjölga ferðamönnum í Rúanda og efla knattspyrnuna í landinu.