Hannes Hólmsteinn Gissurason, stjórnmálafræðiprófessor við Háskóla Íslands, segir á Facebook í dag að það yrði kaldhæðni örlaganna ef Þorgerður Katrín Gunnarsdóttir, formaður Viðreisnar og fyrrum ráðherra Sjálfstæðisflokksins, myndi framlengja stjórnmálalíf Dags B. Eggertssonar, borgarstjóra. Niðurstöður borgarstjórnarkosninga benda til þess að Viðreisn sé í oddastöðu þegar kemur að myndun meirihluta.
Hannes segir að Dagur hafi verið sá sem barði í borðið þegar ráða átti Þorgerði sem forstjóra Hörpu árið 2012:

„Það væri kaldhæðni örlaganna, ef Þorgerður Katrín Gunnarsdóttir ætti þátt í því að framlengja stjórnmálalíf Dags Bergþórusonar Eggertssonar. Það var Dagur, sem barði í borðið árið 2012 og kom í veg fyrir það, að hún yrði ráðin forstjóri Hörpu, þótt hún væri langhæfasti umsækjandinn og meiri hluti stjórnarinnar vildi ráða hana. Þess í stað var ráðinn flokksgæðingur Samfylkingarinnar, Halldór Guðmundsson, fyrrverandi framkvæmdastjóri Máls og menningar,“

segir Hannes.