Elliði Vignisson, bæjarstjóri í Vestmannaeyjum og oddviti Sjálfstæðisflokksins, hyggst opna baðlón í nýja hrauninu í Vestmannaeyjum. Málið er á kosningaskrá flokksins og staðfestir Elliði í samtali við Eyjuna að bærinn hafi leitað til eiganda Bláa lónsins og annarra fjárfesta.
Elliði á undir högg að sækja í komandi kosningum eftir að Heimaey tilkynnti um framboð sitt, en samkvæmt heimildum Eyjunnar er framboðinu beinlínis beint gegn Elliða. Elliði hefur verið með hreinan meirihluta frá árinu 2006 en samkvæmt könnun Fréttablaðsins frá því í apríl er meirihlutinn fallinn.
Elliði er spenntur fyrir nýja verkefninu og segir það vel á veg komið.
Myndir þú kalla þetta kosningaloforð?
„Baðlón í hrauninu er á stefnuskrá Sjálfstæðisflokksins. Ferðaþjónusta er gríðarlega mikilvæg atvinnugrein hér í Vestmannaeyjum og við þurfum að skapa hér sterka segla því það er erfiðara að koma hingað til Vestmannaeyja en margra annarra staða. Það höfum við verið að gera með því sem snýr að eldfjöllum, því sem snýr að hvölum og því sem snýr að lundum,“ segir Elliði og bætir við. „Við stigum mjög stór skref í samstarfinu við Merlin Entertainment, sem er næst stærsta afþreyingarfyrirtæki í heiminum á eftir Disney. Þetta er næsta skref á þessari vegferð, að skapa innviði í ferðaþjónustu í Vestmannaeyjum og sækja fram á þeim vettvangi.“