Nú er eitt ár þar til næst verður kosið til Evrópuþingsins, þings Evrópusambandsins, en þingið gæti tekið miklum breytingum frá því sem nú er að kosningum afstöðnum. Umfangsmikil skoðanakönnun um viðhorf íbúa aðildarríkja sambandsins til þess sýnir að í mörgum af stærstu aðildarríkjunum eru íbúarnir þeirrar skoðunar að samstarfið stefni í ranga átt.

Almennt séð er fólk ánægt með ESB-aðildina en að meðaltali telja 60 prósent ESB-borgara að aðildin sé til góðs en 12 prósent telja hana slæma. Þetta sýnir svokölluð Eurobarometer mæling.

En þrátt fyrir að fólk telji almennt að það sé gott að taka þátt í ESB-samstarfinu þá er það ekki ávísun á stuðning við flokka sem aðhyllast ESB í kosningunum á næsta ári. Að meðaltali telja 42 prósent íbúa ESB að samstarfið stefni í ranga átt þessa dagana. 32 prósent telja að samstarfið stefni í rétta átt. Þetta gæti fært atkvæði til flokka sem hafa efasemdir um Evrópusamstarfið. Danska ríkisútvarpið skýrir frá þessu.

Það ætti að vekja leiðtoga ESB til umhugsunar að í Frakklandi og á Ítalíu, tveimur af stóru ríkjum sambandsins, finnst fólki sambandið stefna í ranga átt. 49 prósent Ítala eru þeirrar skoðunar og 46 prósent Frakka. 24 prósent Ítala telja sambandið stefna í rétta átt og 23 prósent Frakka eru sömu skoðunar.