Varnarmálaráðherrar Danmerkur og Svíþjóðar funduðu á þriðjudaginn í Kaupmannahöfn um aukið samstarf herja ríkjanna í Eystrasalti. Þetta aukna samstarf er tilkomið vegna breyttrar stöðu við Eystrasalt en Rússar hafa látið sífellt meira til sín taka þar á undanförnum misserum.

Peter Hultqvist, varnarmálaráðherra Svíþjóðar, skrifaði lesendabréf sem birtist í Sydsvenskan á þriðjudaginn. Þar segir hann að samvinna ríkjanna hafi þróast og dýpkað á undanförnum áratugum. Landfræðileg og menningarleg nánd ríkjanna skapi þörf fyrir að mæta nýjum aðstæðum í sameiningu.

Hin aukna samvinna mun að mestu snúast um eftirlit úr lofti.

Í báðum löndum er nú verið að auka fjárframlög til herja ríkjanna en ráðamenn beggja ríkja telja að ákveðin ógn stafi af Rússum og hafa áhyggjur af ágengni þeirra.

Danir eru aðilar að NATO en Svíar standa utan varnarbandalaga.